RREHBA
Tizrawin di tusna d welmad n tusnakt ,immeγnassen d inneγmassen , idemmassen d isartiyen d imarayen n uddabu , wid ilemden slid ad skarksen izerfan n wemdan , imgallen n talsa utlay tutlayt nsen , lmed di tusniwin nsen tidin isεan aswir muqṛen deg-innegura , wigi sumata d arraw nsen widin ur d-sεin ara , widin yellan irit n wahil amcum
Wid iseftayen ahil n uddabu, rrefden taγect aεlayen ,ttekend yakk timura ,maca si tama naḍen lan wid irrefden ahil n tentatit ,tantatit isεan achal n leqrun di laεmer-is ,widin yettin asebtar i wedlis wwin-d ahric n tsekla ,n yedles sumata ,wid iccenun ttawin-d ażawan i mačči n dkir ,wid irefden imru ttarun γef inesayen n zik γef tγarma d yergazen-is i illan d imgaruyen n lhaq icban : MASSINISSA,YUGURTEN,KUSSAYLA ... a tag
.....................
Ma yella yizzen nni am-ackit
Tidett n tuttra d tiririt
Γef tayri izedγen γri
Ma yella lḥaq ta tγeḍlit
Γeŗ sdat γwezifet ddunit
Ttalseγ-d yalass tiγŗi
Teγli taffukt tussa-d tmeddit
ṭṣaγ urggaγ yir targit
ṭfaγ-d afus-im deg-ufus yidi
Ttγenniγam-d yiwet n tesfift
Γef-tudert umezzul taεezrit
I icbaḥ ma nemqaŗab di tekti
Ukiγ-ed ufiγ d tawaγit
Ay tehuskiḍ lemnam isefḍit
Tejraḥ tasa yettru yeżŗi
ḍmaγ tesdukel-aγ tbaqit
Nettmeslay akk taqbaylit
Ziγ deg-wul i yuzzel iγissi
Ttnadiγ taqcict taḥaŗmit
Ikem-icban a tajeğğigt
Muqel iman-im di lemri
Isem-im iṭṭef tamassit
D’amagnu taqcict tafenṭazit
Tehuski tayri amek s kemmi ?
Muṛṛad Ass n 21/09/ 2008
Lweqt la iteddu
Axxam-iw yetthuddu
Yella yiwen wass d ass-is
Izzuran yewwet burreku
Lğedra tqaɛd tetthuzu
Yekna waḍu di lqed-is
Yewwet ifeṭiwej tuqqel d assafu
Aḥbib-is d times tettsuḍu
Tuγal terzeft ar wakal-is
Taxsayt tettembiwil tneddu
Affus di lxir yettkuddu
Yerbaḥ wemdan tudert-is
Anda taferka teğuğğeg tlehu
Yal lxir deg-s iffessu
Yal lḥaq yessen lesrar-is
Ma d yir ṛṛay werjin ad yeṛsu
Anda yella lɛar deg-s add-yeglu
D awezγi ad-yaɛreḍ di rbeḥ-is
Yal sbaḥ kul wa amek idaɛu
Di zhar-is ad-isemar ad yentu
kul wa yenṭel di tesraft-is
Muṛṛad ass n 19/10/2013 Talast-iw
Yegguma wul di nhati
Yekkaw deg-uskwakwi
Qaṛen deg-wul n ciṭan
Skefleγ-d ażekka n tayri
Xedmeγ-as ṛuḥ d ilelli
Yuflaw-d ger wid yelhan
Σaceγ-d yides ciṭ n tegwti
Ur gziγ ma d tilawt neγ d tirgi
Hat tella lγela id-yeglan
Ayen I zerɛaγ yerka ur yemγi
Wa maɛdur wa d aḥeqqi
An-steqsi di ṣwab yellan d selṭan
Ur yeli wugur di teγṛi
Neγ lexsara n westeqsi
Wala tteqsir n wussan d wuḍan
Leḥmala n wul tif kulci
Wer yir neyya wer acetki
Ulamma tagnitt d tin iγ-d yefkan
Ar taggara ażekka nni id-nelli
Timedlin γument di tfekki
Slid cama deg-wul yeṛγan
Muṛṛad Ass n 15/01/2012 Ażekka n tayri
Tadyant n tayri
* Tadyant nni n sin
Widin ur nessin
Id-asen-d yewwi lḥal
Teddun d tayuga ur-żŗin
Lużen,čan naγ ur swin
Tenḍen di tyerza n wakal
Teddun ṣuben naγ ullin
Lmizan nsen ur-d iwzin
Tutlayt nsen d’azal n wufal
* Asentel nni d yiwwen
Ul-is izga yuḍen
Tenγat tawla n tayri
Deg-ubrid m’ id-mlalen
Slid ṭuqten wuguren
Warjin yeweḍ yeswi
Aḍu nn’id-ihuben
D win iγ-ihudden
Nteneḍ I wawal n teγŗi
* Muqŗet mliḥ teyta
Deg-ul texdem cama
Lhem-is ur isεi sbaŗ
Nek nniγ-as nettat tenna
Timlilit s wazal teswa
Ul yeqim ka yeqbaŗ
Cukaγ deg-warezg ur nesεa
Yeli imiżli di tirga
Nesaram ad-ifti zhaŗ
* Aqcic di zhaŗ itent-yuγ
Yuγal d tidett d amenuγ
Ur ttemlilint-ara tekta
Tenḍaγ di tesga tezuγ
Aṭṭan-iw am-tin hduγ
Ad-am ihuz tafekka
Deg-wanzi nni ka cennuγ
Deg-s ttalsaγ ttaruγ
Ma d aqaŗŗu ur-ireffed-ara
* Lkaγeḍ ad-iqim d anagi
D’assa naγ d iḍelli
Ismucuh isugun azekka
Sin nni γaf id-ittγenni
D tadyant-is n tayri
Iγelben yal lgirra
Yella yiwen ittcetki
Wissin di tnegarut-a yeγli
W’illan d’ajegg’ur-yegz’ara
* Di gežžu nni ur-gziγ
Qimaγ d ayiwen ŗγiγ
Win muqŗen qaŗen ishetrif
Di tidett iban w i-ttlawiγ
D lğarḥ aqdim I ttawiγ
Uḍnaγ aṭṭan n bessif
Hat d lhem nn’ur-ŗwiγ
Εuhdaγ-t werjin it-ğiγ
Γas ul di tilawt isḥisif
* ṭṭuqten iberdan
Aamŗen yal w’anda it-rran
Nek lhaγ di tżegwa
Zun farsaγ ,xeddmaγ I- ilhan
Iquŗ-iy’ujeğğig iεeddan
Amek ad-iṣeggem uzekka
Zgan zelgen wussan
D’afus d tqabact id-ḥkan
Di lkaγeḍ kulci yella
* Iggul wakud dgi
Ur-walaγ tafat igeni
Γas lama s lexsaṛa
Aken tebγu talwit tilli
S win aεzizen teggul-iyi
Teggul s laεz d lḥaŗma
Ma yella zhaŗ-iw di ŗebbi
Yamen w’is-ihwan yamni
Ad-illiγ d’ayiwen alama tefna
* AsmI iy-liγ mecṭuḥaγ
Deg-ul-iw i-la saramaγ
Ad-illiγ am-nek am-wiyaḍ d’argaz
Ar deffir werjin uqlaγ
Awal-iw ad-at siwḍaγ
Ur-tedraγ d’aḥezaz
S wudem naγ adrim ur-ttbedilaγ
Akken yili lḥal tidett a tt-alsaγ
I ibγun nεac tanṭelt tγaz
*Di tedyant tussa-d taggara
Ad tfak s tiżeṭ telha leḥdaqa
Anemsuref garraγ i- isellen
Yella weqcic di tama
Iḥemmel yiwet tif yal sεaya
Ulac waa-tt-id isumlen
Am-kem tidett ay-teswa
Ur ttbedilaγ tajeğğigt s lğifa
Surfet-iyi s wid iεużgen
* M’ara ak-εaŗqent yewεaŗ
Yefnak ay-amdan sbaŗ
Xemmem γeŗ sdat s laεqel
Akud werjin yesaŗ
Yella yiwen d’aḥeqqaŗ
Cγel-is di lehmum yugel
Yelha laεqel xdem ay-ul leqŗaŗ
Tiṭ tebεad tmuγli-s γef-uḍaŗ
Lweqt iḥemmel ad-yazel
* Tamuγli deg-tmuγli
Iles yebda yettγenni
Yettawi-d yal d’asefru
Yelha yiwen ma yeddura tili
Ad-yaweḍ I- ittmenni
Fell-aγ ad-yfrir wagu
Mačči ciṭ I-inna yimi
Iccennu tasartit tayri
Γlay ilelli deg-usaru
* Yella yiwen d’aεesas
Gmas s yiles d’aḥlalas
Win iḥuzz’at-yegzem
Isexdem di yal ŗṣas
Isenγes ula di lqima-s
Iḥemmel i-wiyaḍ uguren
Weklaγ taflest d laεnaya-s
Win izenzen di lḥarma-s
Amek ad-izwiγen wudmawen ?
* Deg-wawal aqlih saliγ
Ur barnaγ deg-way d-nniγ
D’ayen yunγen deg-wul
D tawaŗdett I γef-rḥiγ
Ŗuḥaγ di targit ur-d zziγ
Di tilawt nettemlili s wazul
Akken i bγuγ illiγ
Lexṣaṣ isefcal isiwziγ
Riγ-tt d tayr’umegdul
26,27,28 si yennayer 2009 murrad At Zayed
Amennuɣ n nnif d lḥeṛma
Affus deg-uffus nettnadi tiddukla
Wiyaḍ teddun cban izerman
Win iɣazen lsas iṣṣeḥa
Ad yesbed iɣerban d lḥara
Sqef-is ur yesεi isalasen
Agdud yeran di ṭarf tigza
Ittnadi kan ad iseweq ɣef-selfa
Ad yenfeḍ ula d ciṭ yebnan
Nteddu lḥif id-nεedda
Yal tiɣmert idim teffud lqaεa
Wiyaḍ la seqḍaεn tigusa d wuglan
Axen affus-iw a win asif yes yegla
Win iεarḍen tament ur yesqena
Mačči d aḥebar d ineẓman it-iceɣben
Iswi di lbal-is d tagelda
Yess ad iɣellet ayen ur yettaweḍ ara
Wiyaḍ ddaw n uḍar ar ttidiren
Akken is-yenna ugellid yugurta
Mi tufiḍ mmis n umaziɣ yekna
Inni-as d gmas it-yewten
Mi iqaεd umennuɣ d wul yeṣfa
Ad yexdaε yiwen s yir nneya
Tasartit mačči d tin yesufuɣen
Amgaru d yiɣil ad yesɣers snesla
Ad yemzel wuccen di lexla
Agdud d iɣil it islelliyen
ɣas ma nɣellet ccama
s ubeddel n wacḥal d tasuta
ad fakken iɣilifen
ma nezga nteneḍ i lkaεba
d ilem i nessunuɣ iṛṛeṣṣa
llit-d allen ay imaziɣen
yal yiwen s waffud d ṣfa
ad yenger uẓẓar n εuqba
an-sbed tisas n massenssen
ddnub deg-yaεrar nneɣ iεebba
ma ur nezwi tuyat tik nekna
d lḥq neɣ d nger ar idummen
Muṛṛad At Zayed ass n 03/11/2014
Yettif lexṣas n tudert n yalass
Wala askerfef n laƐqel d tigza
Yettif win yuɣen tiyta di tfekka-s
Wala win yeggujlen di tekta
Yettif tiderɣelt n wallen d layas
Wala fennu n yezṛi n laƐqel-ya
Uffiɣ aqaṛṛu i wemgarru d ṛṣas
Wala at westuti d ṛexsa
Akken yenna wawal ay amessas
Tabburt ur tt-yesƐi iwacu tissura
Win yevnan axxam iṣeggem di lsas
Ur yezmir ad ivarri di znezla
Win ixeddmen ala di txidas
Ad yesendu qedṛan d tmeṛzuga
Tawacul-is teqquṛ wer tarwa-s
Akken is-d tevda ar tfak taggara
Amdan yeddren tidett tissas
Awi iḍlan tuggi d tisegnit i lexyaḍa
Win iɣṛan lbegra d usefru n nass
Ad iccennu ɣef-tirrugza
Asalas ad yeqqim d asalas
Tameṭṭut teggul s tevra terra
Murrad At Zayed 21/07/2015
Yefcel wemdan di tikli
Imena di lmut add testeqsi
Ad fakken ikurdan d telkin
Ad ihenni si ndeṛ d nhati
Tigerist icudden ad tefsi
Ad iɣum lƐib ddaw n tmedlin
Akk-id mektin yemdanen irkeli
Ad-ak siɣen tafat di ṭlam tettcabi
Deg-ucekkar add-gent tizza
Yedder d amdan lƐali
AnƐam i medden d tirni
Assa yuɣal di ṛeḥma
Ddunit akka ad t-yebna rebbi
Yal wa nnuba-d add-tezri
Amkan-is di lğenet yella
Iles n wemdan di ṛsas yessifi
S tmettant kan id yettmekti
Syen akkin tudert tefna
Am issufa yakk ar nexsi
Yal was tdafi-s ay d tikti
A melmi id-tusa mṛeḥba
Muṛṛad At Zayed 14/03/2015
Vniɣ axxam yekfa
Ddiɣ-as di levɣi s lqella d laεella
Yeffeɣ-d d tadwirt n ugellid
Zedmeɣ-d taεekemt teqwa
Iḍarren fakken si tfexsa
Rrniɣ amdeṛkel n yir brid
Zṛuvat wecmen-iyi s yal d ccama
Ta ur tevεid di tfawett n ta
Ɛamdeɣ ad sɣerṣeɣ yal d lqid
Udem-iw yezga yebbehva
Mi yegza wul anda tewweḍ teyta
D aksum yekcem ṣdid
Yella cfaε , maεna ilaq-aɣ dwa
Ad-idawi waggas ad teḥlu tfekka
Ad iwenaε lḥal ad icemaε weḥdid
Ayen i εatbeɣ yeblanṭaḥ di lqaεa
Yesembawel-iyi s lefqaε
Nek ḍmaɣ ad yili d ummid
Yeqqim-d ṣbeṛ ma nesεa
Ma ulac terra tmara
An-εawed lsas s kra yellan d awεid
Muṛṛad At Zayed 28/01/2014